KidsOut World Stories

Pataku Nitefoͻ no ne N’akwan    
Previous page
Next page

Pataku Nitefoͻ no ne N’akwan

A free resource from

Begin reading

This story is available in:

 

 

 

 

Pataku Nitefoͻ

no ne N’akwan 

 

 

 

 

 

 

 

 

 

 

Berԑ bi atwam, na pataku bi wͻ hͻ, na n’ani ate sԑdeԑ mpataku ani ate no ara. Wakyini apԑ aduane anadwo no nyinaa a wannya bi. Ԑduruu ahamakye no, pataku no weawea kͻdaa kwan nkyԑn wͻ nwura no mu. Ͻbisaa ne ho deԑ ͻbԑtumi ayԑ bio a ԑbԑnya aduane adi. 

Ͻda hͻ a ne ti da ne bͻwerԑ so no, ͻtee nsunam pampan. Ͻpagyaa ne ti kakra. Ͻhwԑԑ kwan no so anaafoͻ hͻ no, ͻhunuu sԑ afunum bi retwe adaka bi reba. 

Pataku no kaa no ne tirim sԑ, ‘Ԑyԑ pa ara, wei ne aduane a watwԑn akyԑ yi.’

Wantwentwԑn so koraa na ͻde ahoͻhare firi nwura a ͻhyԑ mu no mu. Ͻtwee ne mu daa kwan no mfimfini yԑԑ ne ho te sԑ deԑ wawuo. 

Adaka no bԑnn pataku no, owura a ͻretwi no hunuu no. Ԑnam sԑ ͻsusuu sԑ ampa ara wawu nti, Ͻteam ‘Whoa! Whoa!’ sԑ afunum no nnyina. 

Afunum no gyinaeԑ. Owura no bͻ pinii pataku no hwԑԑ no dinn. Ͻhunuu sԑ ͻnhome. 

‘Asԑm ni!’ ͻkaa saa. ‘Ԑyԑԑ dԑn na pataku yi wu tͻͻ ha? Wei deԑ mԑtumi de ne nwi yi ayԑ nkatasoͻ kama pa ara ama me yere!’ 

Ͻkaa saa no, ͻsͻͻ pataku no kͻn akyi maa ne so. Ͻtwee no kͻͻ adaka no ho na ͻmaa ne so de no too so, gyaa no too nsunam no so.

Afei owura no maa afunum no toaa so. ‘Kaa wo ho, Nyamebԑkyerԑ! Kaa wo ho, Bourean!’ 

Afunum no hyԑԑ aseԑ tuu mmirika. Owura no nante faa afunum no ho de abaa hwee wͻn sԑdeԑ ԑbԑyԑ a wͻbԑkͻ ntԑm. Na ne ho repere no sԑ ͻbԑduru fie na wakͻyi pataku no nwi. 

Berԑ a afunum no rekͻ n’anim no, na pataku no nso ahyԑ aseԑ de ne nan repiapia adaka no. Owura no deԑ ͻreka ne ho na adaka no nso retwi, ԑnna nsunam nso retete gu wͻ akyire hͻ.

Pataku no piaa nsunam pii guu fam no, ͻhuri firi so yԑԑ ntԑm tasee nam no firii kwan no so. Ͻtasee nsunam no boaa ano no, ͻde kͻwuraa ne da mu hyԑԑ aseԑ weeԑ. Na ԑkͻm de no ankasa. 

Pataku no hyԑԑ aseԑ sԑ ͻredidi ara pԑ na ͻnyaa ͻhͻhoͻ bi a n’ani nna no kwan, ԑyԑ torͻmoo! 

Torͻmoo no kaa sԑ, ‘Kuta mu oo, me yͻnko. Yie! Nsunam na ԑdͻͻso sei! Mԑtumi awe bi? Nsunam dͻ me kͻn kԑkԑ!’

Pataku no kaa sԑ, ‘Aa, fa wo kͻm kͻ, me yͻnko. Menyԑ adwuma ngu obi botom. Sԑ nsunam ho kͻm de wo sԑdeԑ woreka no a, wo nso fa wo podua kͻhyԑ tadeԑ no mu sԑdeԑ meyԑeԑ no. Ԑnkyԑ koraa wobԑnya nsunam pii awe.’ 

Torͻmoo no kaa sԑ, ‘Ԑnneԑ kyerԑ me sԑdeԑ yԑyi no. Mennim sԑdeԑ yԑyi nam.’ 

Pataku no nwiinwiiԑ kaa sԑ, ‘Saa mmom, me yͻnko? Na wonnim sԑ ahopepereԑ tumi ma wokͻ mmeammea a wompԑ sԑ wobԑkͻ na ԑsan kyerԑ wo nneԑma a wonsusu da sԑ wobԑhunu? Kͻ tadeԑ a ԑwͻ kwaeԑ no mu no ano anadwo yi. Fa wo podua wura nsuo no mu na tena ase dinn a wonkeka wo ho kͻpem ahamakye. Sԑ awia hyԑ aseԑ sԑ ԑrepue a, twe bԑto kͻnkͻn so. Wode nsunam bebree bԑpue, anhwԑ koraa a wobԑnya me deԑ yi mmͻho anaa mmͻho mmiԑnsa mpo.’ 

Torͻmoo no anka hwee ԑnna ͻde mmirika kͻͻ tadeԑ no ano wͻ kwaeԑ no mu. Ͻde ne podua nyinaa wuraa nsuo no mu tenaa ase dinn. 

Saa anadwo no mframawͻ bi bͻeԑ. Na ano yԑ den ara kyerԑ sԑ ԑbԑtumu ama wo tԑkyerԑma asensene wͻ w’anom. Nsuo a ԑwͻ tadeԑ no mu no sene yԑԑ bawee sͻͻ torͻmoo no podua mu. Berԑ bi duruiԑ a na ͻntumi nnyinaa ano bio no, torͻmoo no twee ne ho sԑdeԑ ͻbԑtumi biara. Awerԑhosԑm ne sԑ torͻmoo no annya nsunam pii no na mmom ͻhweree nepodua! 

Ͻteateaa mu dennennen hurihurii wͻ ͻyeaw mu. Ԑnam sԑ pataku no adaadaa no nti ͻde abufuo kͻͻ ne dan no mu hͻ. 

Mmom, na pataku nitefoͻ no nim kwan a ͻbԑfa so afiri torͻmoo no abufuo no mu. Ͻhunuu sԑ torͻmoo no reba a podua nka ne ho no, ͻdwane firii ne dan no mu kͻhyԑԑ dua teaa bi a ԑbԑn no mu. 

‘Mo, mo, mo, me yͻnko!’ pataku no kaa saa. ‘Na nsunam no na awe wo podua yi anaasԑ pԑsԑmenkomenya nti woawe nsunam no nyinaa afiri tadeԑ no mu?’

Berԑ a torͻmoo no tee sԑ pataku no redi ne ho fԑw no, ͻbͻͻ hoo kͻͻ dua no ho. Mmom, na tokuro ketewa a ԑwͻ hͻ no sua dodo, ԑno nti torͻmoo no ankͻ mu. Ͻpԑԑ ne man no bi a akoa na ano nso yԑ feaa te sԑ darewa. Afei torͻmoo no hyԑԑ aseԑ sԑ ͻde reyi pataku no te sԑ deԑ ͻreyi nam wͻ nsuo mu. 

Berԑ biara a ԑbԑsͻ ne nan baako no, pataku no tea mu sԑ: ‘Aane, yere wo ho twe, ogyimifoͻ! Woretwe dua no, na ԑfa me ho bԑn?’

Berԑ biara a ԑbԑsͻ dua no mu no, na watea mu sԑ: ‘Agyei, me yͻnko! Ntwe; wͻrebԑpan me nan baako afiri hͻ!’ 

Torͻmoo no yԑeԑ yԑeԑ nanso ne nsa anka pataku no. 

Awieeԑ no, berԑ a ͻdaadaa owura no ne torͻmoo no wieeԑ no, pataku no da maa ne ho baee no. 

Wei ne anansesԑm a ԑfa pataku nitefoͻ ne n’akwan no ho. 

Enjoyed this story?
Find out more here