KidsOut World Stories

Asukͻtwea    
Previous page
Next page

Asukͻtwea

A free resource from

Begin reading

This story is available in:

 

 

 

 

Asukͻtwea

 

 

 

 

 

 

 

 

 

*

Winter bi, berԑ a sunoo atotͻ te sԑ ntakra a ԑfiri wiem reba no, ͻsͻͻnͻ bi pԑԑ sԑ ͻbԑnya abaayewa. Ankyԑ na n’abisadeԑ baa mu. 

Wͻtoo abͻfra no din Asukͻtwea ԑfiri sԑ na ne wedeԑ ani yԑ fitafita te sԑ asukͻtwea. N’afono so kͻkͻkͻkͻ te sԑ mogya. Ԑnna ne tirinwi tumm te sԑ dubiri.

Wͻwoo Asukͻtwea no, ankyԑ koraa na ne maame firii mu. 

Afe twaa mu no, ͻhene a na ͻwͻ saa ͻman no mu no waree bio. Na ͻhemaa foforͻ no ho yԑ fԑ pa ara. Na ͻwͻ anyankomade ahwehwԑ bi. Sԑ ͻhwԑ ne mfoni wͻ mu a, ͻbisa sԑ: 

‘Ahwehwԑ, hwehwԑ dan ho, 
Hwan na ͻyԑ kͻkͻͻ pa ara?’ 

Na ahwehwԑ no ayi ano sԑ:

‘Wo na woyԑ kͻkͻͻ pa ara wͻ wͻn nyinaa mu.’

Afei na ͻhemaa no ani agye. Na ͻnim sԑ berԑ biara ahwehwԑ no ka nokorԑ. 

Nanso da biara na Asukͻtwea renyini nketenkete. Na ͻyԑ abͻfra a ne ho yԑ fԑ, na ͻnyini maa ne ho yԑԑ fԑ ara. Ͻheneba no ho bԑyԑԑ fԑ senee ͻhemaa no. 

Ԑno nti da koro bi, berԑ a ͻhemaa no bisaa ahwehwԑ no n’as’m no, ԑyii ano sԑ:

‘Me Hemaa, woyԑ kͻkͻͻ deԑ, ampa,
nanso Asukͻtwea yԑ kͻkͻͻ sene wo.’

Ͻhemaa no anim sesaeԑ. Firi saa berԑ no rekorͻ, ͻtann Asukͻtwea senee awuduro. Adeԑ rekye a adeԑ resa no na n’abufuo rekͻ soro. Woma w’ani bere obi a, ԑte sԑ deԑ woama wurabͻne kwan wͻ w’akoma mu. Awieeԑ no ԑnyini boro so bԑsi wo mene. 

Afei na ͻhemaa no ntumi ntena sԑ ͻbԑhunu Asukͻtwea da biara saa. Ԑno nti ͻmaa ne bͻmmͻfoͻ no dii amumuo bi. 

‘Fa Asukͻtwea kͻ nwuram. Mempԑ sԑ mԑhunu n’anim bio da. Ԑwͻ sԑ wokum no. Fa n’ahurututuo ne ne berԑbo bԑkyerԑ me sԑ ampa wawu.’

Ͻbͻmmͻfoͻ no bͻͻ mmͻden sԑ ͻbԑyԑ deԑ wͻakyerԑ no sԑ ͻnyԑ no. Ͻdii Asukͻtwea anim kͻͻ nwuram no mu. Ͻyii ne sekan mpo sԑ ͻrekum no. 

Asukͻtwea suu dennennen. ‘Ow! Mesrԑ wo nkum mu. Mehyԑ bͻ sԑ, sԑ woma mekͻ a, mԑdwane awura nwuram no mu a mensan m’akyi mma bio.’ 

Ͻyԑԑ no mmͻbͻ ma no kaa sԑ, ‘Yoo, ԑnneԑ dwane ԑ,’ N’akoma kͻͻ fam ԑsiane sԑ wanni saa amumuo no. 

Berԑ a ͻbᴐmmͻfoͻ no nenam nwuram hͻ no, kͻkͻte kumaa bi di mmirika bԑpaa ne ho. Ͻtoo no tuo yii n’ahrawa ne ne brԑbo de kͻmaa ͻhemaa no sԑ ampa Asukͻtwea awu. Ͻhemaa tirimuͻdenfoͻ no ma wͻnoa maa no, na ͻweeԑ. Na ͻdwene sԑ wawiewie Asukͻtwea ara ne no. 

Ԑkaa Asukͻtwea nko ara wͻ nwuram hͻ no, nnua a atwa ne ho ahyia no ara mpo yii no hu. Ehu bͻͻ no ara ma afei na ͻnhunu deԑ ͻnyԑ ne ho bio. Ehu no mu no, ͻhyԑԑ aseԑ tuu mmirika faa aboͻ nanaanam ne nwura kusuu no mu. Abͻpͻn a wͻwͻ nwura no mu no tuu mmirika sann ne ho nanso wͻanyԑ no hwee. 

Asukͻtwea tuu mmirika wͻ kwaeԑ no mu ntԑm so kͻͻ akyiri sԑdeԑ n’ahoͻden bԑtumi. Esum hyԑԑ aseԑ sԑ ԑreba no, ͻhunuu fie ketewa bi, na ͻbͻwuraa mu. 

Na adeԑ biara a ԑwͻ mu yԑ ketekete. Na ͻpono bi wͻ hͻ a plԑte nson sisi so, a ebiara wͻ ne fͻͻko, sekan ne atere. Na kuruwa nketewa nson nso wͻ hͻ. Na mpa nketewa nson mpo wͻ ban no ho. 

Na ԑkͻm ne sukͻm de Asukͻtwea ara ma ͻdii plԑte biara mu aduane kakra nomm kuruwa biara mu nsuo kakra. Afei ͻkyeaa ne ho too mpa no mu baako so faa mu daeԑ. 

Esum baa kabisii no, wͻn a efie ketewa no yԑ wͻn dea no san baa fie. Na wͻyԑ mmoatia nson a wͻpuee da no kͻyԑԑ adwumaden da mu no nyinaa. Na wͻyԑ adwuma wͻ baabi a wͻtu fam agudeԑ a ԑwͻ bepͻ no mu doho ara no. 

Mmoatia no sosͻͻ nkanea nsom hwehwԑԑ dan no mu hͻ yie. Wͻtumi hunu sԑ obi aba wͻn fie hͻ. 

Deԑ ͻdi kan kaa sԑ, ‘Hwan na atena m’akonnwa no so no?’

Deԑ ͻtͻ so mmienu kaa sԑ, ‘Hwan na adi me paano no?’

Deԑ ͻtͻ so mmiԑnsa kaa sԑ, ‘Hwan na adi me koko no?’

Deԑ ͻtͻ so nnan kaa sԑ, ‘Hwan na awe m’atosodeԑ no?’

Deԑ ͻtͻ so nnum kaa sԑ, ‘Hwan na ͻde me fͻͻko no adidi no?’

Deԑ ͻtͻ so nsia kaa sԑ, ‘Hwan na ͻde me sekan no atwa adeԑ no?’

Deԑ ͻtͻ so nson kaa sԑ, ‘Hwan na ͻde me kuruwa anom adeԑ no?’

Afei deԑ ͻdi kan no hwehwԑԑ hͻ. Ͻduruu ne mpa ho no, ͻhunuu Asukͻtwea sԑ wada nnahͻͻ. Ͻfrԑԑ wͻn a aka no, na wͻtwa hyiaa hͻ susuu ahodwirie su nketenkete.

‘Ow!’ wͻsuiԑ. ‘Abaayewa na ne ho twa sei!’ 

Wͻannyane no, na mmom wͻma no daa mpa ketewa no so anadwo no nyinaa. 

Adeԑ kyeeԑ no, Asukͻtwea nyaneeԑ. Ahyԑaseԑ no, ͻbͻͻ hu berԑ a ͻhunuu mmoatia nson no, nanso na wͻpԑ nnipa. Wͻbisaa no ne din. 

Ͻyii ano sԑ, ‘Asukͻtwea.’ 

‘Adԑn na woaba yԑn fie ha?’ mmoatia no bisaeԑ. 

Asukͻtwea ka kyerԑԑ wͻn sԑ ne nanoma, ͻhemaa no, na ͻmaa wͻde no baa nwuram hͻ sԑ wͻnkum no. Ͻkyerԑ wͻn kwan a ԑnam so a ͻbͻmmͻfoͻ no gyaee no sԑ ͻnkͻ maa ͻnam so tuu mmirika faa nwura no mu ansa na ͻrebԑpue wͻn fie hͻ. 

Mmoatia no gye too mu sԑ wͻne no bԑtena. Mmom, Asukͻtwea nso gye too mu sԑ ͻbԑnoa aduane na wasiesie wͻn fie hͻ ama wͻn. 

Ԑno nti Asukͻtwea hyԑԑ abrabͻ ase foforͻ wͻ nwuram hͻ. Anͻpa biara mmoatia no kͻ bepͻ no mu kͻtu pԑ sika kͻkͻͻ. Wͻbԑba fie anwummerԑ no, na Asukͻtwea ayԑ wͻn anwummerԑ aduane krado ama wͻn. 

Da mu no nyinaa, ԑbԑka abaayewa no nko ara, ԑno nti mmoatia no bͻͻ no kͻkͻ sԑ: 

‘Hwԑ wo ho yie wͻ wo nanoma no ho. Ԑnkyԑ ͻbԑhunu sԑ wowͻ ha. Deԑ ԑbԑsi biara, hwԑ sԑ womma obiara nwura fie no mu.’ 

Afei, na ͻhemaa no gye di sԑ wawe Asukͻtwea ahrawa ne ne brԑbo. Wanso ho daeԑ mpo sԑ ԑnyԑ ͻno ne ͻbaa a ne ho yԑ fԑ pa ara wͻ wiase nyinaa. Ԑno nti da bi ͻhwԑԑ n’ahwehwԑ no mu kaa sԑ: 

‘Ahwehwԑ, hwehwԑ dan ho,
Hwan ne nnipa a ͻyԑ kͻkͻͻ pa ara?’

Na ahwehwԑ no ayi ano sԑ: 

‘Me Hemaa, woyԑ kͻkͻͻ deԑ, ampa,
Nanso Asukͻtwea yԑ kͻkͻͻ sene wo.
Bepͻ no so baabi, mmarima ntientia bi mu,
Ԑhͻ na Asukͻtwea, deԑ ͻyԑ kͻkͻͻ pa ara no teԑ.’

Ͻhemaa no koma soreeԑ. Ͻhunuu sԑ ne bͻmmͻfoͻ no adaadaa no ԑfiri sԑ Asukͻtwea te ase. Anyankomade ahwehwԑ no ka nokorԑ daa. 

Ͻhemaa tirimuͻdenfoͻ no dwenee ho awia ne anadwo sԑ kwan bԑn so na ͻbԑtumi afa asԑe Asukͻtwea. Ԑnam n’aniberԑ akoma no nti, na ͻntumi ntena wͻ berԑ a obi ho yԑ fԑ sene no. 

Ͻfaa deԑ ͻbԑyԑ ho adwene wieeԑ no, ͻyԑԑ afe de suman yԑԑ awuduro de faa ho. Ͻde aduro kaa n’anim yԑԑ ne ho te sԑ abrewa. Sԑdeԑ ͻsi yԑԑ no ne ho nti obiara antumi anhunu sԑ ԑyԑ ͻno a. Sԑdeԑ ͻyԑԑ ne ho no nti ͻhemaa tirimuͻdenfoͻ no tumi duoduoo mu ara kͻpuee efie a Asukͻtwea ne mmoatia no te no. Ͻbͻͻ pono no mu. 

Asukͻtwea hwԑԑ mpoma no mu. 

Ͻteaa mu  ‘Mema wo akye! Mepa wo akyԑw. Mentumi mma wo nwura mu.’ 

‘Na wowͻ ho kwan sԑ wotwe wo kͻn?’ aberewa no kaa saa. Ͻyii afe fԑfԑԑfԑ no kͻͻ soro sԑdeԑ abaayewa no bԑhunu. 

Na Asukͻtwea ani gye afe no ho ara ma enti ԑmaa no nyaa no. Ͻbuee pono no.

Aberewa no kaa sԑ, ‘Me dͻfo, bra ha. Ma mennunu wo tirinwi mu yie mma wo.’

Asukͻtwea anhunu sԑ ͻde ne ho rekͻ adwaa mu. Aduro no kaa ne tirinwi ano kakraa bi no ara na ԑyԑԑ adwuma. Ͻbu hweeԑ. 

Ͻhemaa tirimuͻdenfoͻ no kaa sԑ, ‘Afei deԑ manya awie wo koraa.’ Ͻde mmirika tԑntԑ dwane kͻͻ fie. 

Asԑmdԑ ne sԑ, na onwunu adwo ara ne sa. Ankyԑ koraa na mmoatia nson no san baa fie. Wͻhunuu sԑ Asukͻtwea da fam kagyaa no, wͻhunuu sԑ ԑyԑ ne nanoma tirimuͻdenfoͻ no na adi saa dwuma no. 

Wͻhwehwԑeԑ ara kͻpem sԑ wͻhunuu afe a awuduro wͻ ano no. Wͻyi firii Asukͻtwea tirinwi mu no ara na abaayewa no nyaneeԑ. Ankyԑ na ͻkaa deԑ ԑsiiԑ kyerԑԑ wͻn. Mmoatia no san bͻͻ no kͻkͻ sԑ ͻmma n’ani nna hͻ na wammue pono no amma obiara bio. 

Ͻhemaa no duruu fie pԑ na ͻkͻͻ n’ahwehwԑ no anim kͻbisaa sԑ: 

‘Ahwehwԑ, hwehwԑ dan ho,
Hwan ne nnipa a ͻyԑ kͻkͻͻ pa ara?’ 

Na ahwehwԑ no ayi ano sԑ: 

‘Me Hemaa, woyԑ kͻkͻͻ deԑ, ampa,
Nanso Asukͻtwea yԑ kͻkͻͻ sene wo.
Bepͻ no so baabi, mmarima ntientia bi mu,
Ԑhͻ na Asukͻtwea, deԑ ͻyԑ kͻkͻͻ pa ara no teԑ.’

Ͻhemaa no tee saa nsԑm yi no, abufuo kԑseԑ bԑhyԑԑ ne mu. Ͻhunuu sԑ Asukͻtwea da so te ase. 

‘Asukͻtwea bԑwu!’ ͻwe taa so. ‘Sԑ ԑnam ԑno so na mԑwu mpo a ԑnyԑ hwee!’ 

Afei ͻkͻͻ dan bi a asumasԑm wͻ mu mu, na ͻde ne nyankomade no yԑԑ aprԑ bi. Na ԑyԑ fԑ, a yԑasensan ho fitaa ne kͻkͻͻ. Obiara a n’ani bԑbͻ so biara bԑpԑ sԑ ͻbԑwe, nanso obiara a ͻbԑwe biara bԑwu wͻ hͻ ara. 

Ͻhemaa no saan danee ne ho bio. Ͻfaa nwuram hͻ kͻͻ mmoatia no dan ketekete hͻ kͻbͻͻ pono no mu. 

Asukͻtwea hwԑԑ mpoma no mu. 

Ͻteaa mu sԑ, ‘Mema wo akye! Mepa wo akyԑw. Mentumi mma wo nwura mu.’ 

Aberewa no kaa sԑ, ‘Mewͻ aprԑ kamakama bi wͻ hͻ ma wo, me dͻfo.’ 

Asukͻtwea kaa sԑ, ‘Daabi, mefa a ԑnyԑ yie.’ 

‘Hwԑ deԑ ͻrekyerԑ bi!’ ͻhemaa no ano asԑm ni. ‘Deԑn na wosuro? Wosusu sԑ aduro wͻ mu anaa? Hwԑ, Mԑtwa aprԑ no mu mmienu. Mԑdi baabi a ԑyԑ fitaa no na woadi baabi a ayԑ kͻkͻͻ no.’ 

Deԑ ԑteԑ ne sԑ wayԑ aprԑ no sԑ ͻfa baako deԑ hwee nnim na ͻfa a aka no na awuduro wͻ mu. 

Ԑyԑԑ Asukͻtwea akͻnnͻ pa ara. Na aprԑ no yԑ kama sԑ. Ͻhunuu sԑ aberewa no redi ͻfa baako no, afei deԑ na ͻyԑ ho hwee a ԑnyԑ yie. Ͻde ne se sii aprԑ no mu ara pԑ na ͻte hwee fam. 

Ͻhemaa no tweetwee no sԑ, ‘Wo fitaa sԑ asukͻtwea oo, wo kͻkͻͻ sԑ mogya oo, wo tuntum sԑ dubiri oo, seesei deԑ obiara ntumi nnye wo.’ Ͻdwane kͻͻ ne fie kͻgyinaa n’ahwehwԑ no anim na afei deԑ ԑkaa sԑ: 

‘Wo na woyԑ kͻkͻͻ pa ara wͻ wͻn nyinaa mu.’ 

Afei deԑ ͻhemaa no atirimuͻden akoma no tͻͻ ne yam. Anyԑ bie koraa no ne koma tͻͻ ne yam sԑdeԑ otirimuͻdenfoͻ koma bԑtumi atͻ ne yam ara. 

Mmotia no baa fir anwummerԑ no, wͻbԑtoo sԑ Asukͻtwea da hͻ kagyaa a ͻnkeka ne ho. Wͻpagyaa no hwԑԑ ne honam nyinaa sԑ wͻbԑhunu awudeԑ bi wͻ ne ho a. Wͻyԑԑ deԑ wͻbԑtumi biara nanso na Asukͻtwea awu, a wansͻre bio. 

Mmoatia nson no ka bͻͻ mu suu saa ara nnansa. Akyire no, wͻyԑԑ wͻn adwene sԑ wͻbԑkͻsie Asukͻtwea nanso sԑdeԑ owuo mu mpo na ne ho yԑ fԑ no nti wͻkaa sԑ:

‘Yԑntumi nsie no wͻ asase a emu yԑ nwunu sei mu.’

Wͻyԑԑ nhwehwԑ funnaka de no too mu. Wͻde sika kͻkͻͻ twerԑԑ wͻ adaka no ti no so sԑ na ͻyԑ ͻheneba. Afei mmoatia no de adaka no kͻsii bepͻ no so. Berԑ biara wͻn mu baako gyina ho wԑn Asukͻtwea. Nnomaa mpo bԑsuu Asukͻtwea abia wͻ ne wuo ho. Deԑ ͻdii kan ne patuo, ԑnna aburuburo, ԑnna deԑ ͻtwa toͻ koraa ne abrͻnoma. 

Asukͻtwea daa funnaka no mu kyԑreԑ. Daa nyinaa, deԑ na ͻte ara na ͻteԑ, te sԑ deԑ wada no. Ne wedeԑ kͻͻ so yԑԑ fitaa te sԑ asukͻtwea. N’afono yԑԑ kͻkͻͻ sԑ mogya. Ne tirinwi yԑԑ tumm sԑ dubiri. 

Afei, da koro bi ͻheneba barima bi kͻͻ bepͻ no so. Ͻhunuu funnaka a Asukͻtwea da mu no. Ͻkenkann deԑ wͻde sika kͻkͻͻ atwerԑ no, ͻka kyerԑԑ mmotia no sԑ:

‘Fa funnaka no ma me. Mԑma wo deԑ wopԑ biara ahyԑ anan.’ 

Mmotia no kaa sԑ, ‘Daabi, sika kͻkͻͻ a ԑwͻ wiase nyinaa mpo ntumi ntete yԑne Asukͻtwea ntam.’ 

Ͻheneba barima no yii ano sԑ, ‘Yoo, ԑnneԑ fa ma me ԑfiri sԑ mentumi ntena a Asukͻtwea nka me ho. Mԑdͻ no asene biribiara.’ 

Ͻde awerԑhoͻ kasaeԑ ara ma ne ho yԑԑ mmotia no mmͻbͻ. Wͻde funnaka no maa no. Ͻheneba barima no maa ne nkoa no soaa no wͻ wͻn mmatire so. 

Afei, adeԑ nwanwasoͻ bi siiԑ. Berԑ a nkoa no resane bepͻ no, wͻpatiriiԑ. Wͻde funnaka no hwee hͻ kԑseԑ ara maa aprԑ a awuduro wͻ mu a Asukͻtwea kaeԑ no firii ne menem tͻͻ fam. Ͻbͻͻ n’ani kakra na afei ͻtee n’ani koraa. 

Asukͻtwea buee funnaka no so sͻre tenaa ase a na ne ho yԑ.

‘Ow! Ԑhe na mewͻ yi?’ ͻteaa mu. 

Ͻheneba barima no ani gyeeԑ. 

Ͻgyee so sԑ, ‘Wo ne me na ԑwͻ hͻ.’ Ͻkaa deԑ ԑsiiԑ nyinaa kyerԑԑ no na afei ͻkaa sԑ, ‘Medͻ wo sene onipa biara wͻ wiase mu ha. Wo ne me bԑkͻ akͻyԑ me yere?’ 

Asukͻtwea gye too mu na ͻne ͻheneba barima no kͻeԑ. Ankyԑ koraa na wͻwareeԑ. Wͻn ayeforͻhyia no yԑԑ krabԑhwԑ. 

Afei, na Asukͻtwea nanoma tirimuͻdenfoͻ no ka wͻn a wͻtoo nsa frԑԑ wͻn no ho bi. Ͻfaa ne ho kuntann wͻ apontoͻ no ho wieeԑ no, ͻkͻgyinaa n’ahwehwԑ no anim, na ͻkaa sԑ: 

‘Ahwehwԑ, hwehwԑ dan ho,
Hwan ne nnipa a ͻyԑ kͻkͻͻ pa ara?’ 

Na ahwehwԑ no ayi ano sԑ: 

‘Me Hemaa, woyԑ kͻkͻͻ deԑ, ampa,
nanso Ayeforͻyere no yԑ kͻkͻͻ sene wo.’ 

Ͻtee wei no, ͻbaa tirimuͻdenfoͻ no bo fuiԑ. N’aniberԑ koma no hurihurii wͻ ne koko mu, na ͻkaa sԑ, kͻpem sԑ ͻbԑhunu saa ͻhemaa kumaa no, n’ani nnye da. 

Ͻduruu apontoͻ no ase no, ͻhunuu sԑ ayefrͻyere no yԑ Asukͻtwea. Abaayewa a ͻkumm no no te ase ampa ara. Awerԑhosԑm ne sԑ ͻhemaa bonsam no abufuo tuaa n’ankasa ne homeԑ; n’ahosuo sesaeԑ na ͻte hwe wuiԑ. 

Asukͻtwea ne ne dͻfo tenaa ase anigyeԑ mu mfeԑ bebree. Ԑtͻ da bi a na wͻakͻ bepͻ no so akͻsra mmoatia no. Berԑ biara na wͻkae ayͻnkofoͻ a wͻboaa Asukͻtwea wͻ berԑ a na ͻwͻ ahohiahia mu no. 

Enjoyed this story?
Find out more here