KidsOut World Stories

Anikasԑm a Ԑwͻ Sonobo-sonobi Ho    
Previous page
Next page

Anikasԑm a Ԑwͻ Sonobo-sonobi Ho

A free resource from

Begin reading

This story is available in:

 

 

 

 

Anikasԑm a Ԑwͻ Sonobo-sonobi Ho

Iranfoͻ Abasԑm

 

 

 

 

 

*

Na Shirin da so yԑ abaayewa berԑ a n'awofoͻ de no firii ne fie wͻ Tehran de no kͻͻ kuropͻn bi a ԑwͻ Ngresi a wͻfrԑ no London. 

Na Shirin ani nnye ho sԑ ͻne n'abusua mu anuanom bԑkͻtena wͻ Ngresi, nanso ne maame ka kyerԑԑ no sԑ, 'Me ba, ԑno na ԑbԑboa pa ara. Seesei bammͻ nyԑ papa wͻ ha na sԑ wokͻ Ngresi nso a, worekͻhyԑ abrabͻ foforͻ a anigyeԑ wͻ mu ase na woahyia ayͻnkofoͻ ahodoͻ.'

Na Shirin pԑ sԑ ͻsu ԑfiri sԑ na ͻdͻ ne maame ne ne papa pa ara a na ͻmpԑ sԑ ԑbԑfiri wͻn nkyԑn akͻ. Bio, na ͻnnim n'abusua mu anuanom no koraa. Wͻbԑsraa wͻn baako pԑ bi a saa berԑ no koraa na Shirin sua nti na ͻnte deԑ wͻreka aso mpo ԑsiane sԑ na wͻn nso nka Farsi kasa, na wei yԑ Shirin nwanwa pa ara yie.

Ԑno nti, da no duruu so na Shirin maame ne ne papa de no tenaa kaa mu kͻͻ wiemhyԑgyinabea hͻ na ne sewaa de no kͻforoo wiemhyԑn no. 

Berԑ a Shirin papa ne ne maame dii n'akyi kͻͻ baabi a owura no bԑhwԑ ne pasepͻto mu ahwԑ ne tikiti no, ͻkaa sԑ, 'Mesuro.' 

'Wosuro sԑ sԑn?' ne papa bisaeԑ. 'Ԑnyԑ wone abaayewa kokoͻdurofoͻ a berԑ a topaeԑ no rete gu kuro yi so na wonsuro hwee no? Ԑnyԑ wo ara ne abaayewa a na daa woka sԑ yԑmfa wo nkͻ sukuu berԑ a na wo mfԑfoͻ mpanimfoͻ abobͻ hu a wͻhyehyԑ wͻn awofoͻ nkyԑn no?' 

Shirin kaa sԑ, 'Ԑno nko. Wei yԑ me fie.' 

Shirin maame buu nkotodwe wͻ abaayewa no nkyԑn famm no de ne nsa fefaa ne tirim. Ͻka kyerԑԑ no ne ba baa no sԑ: 'Menim sԑ wobԑma yԑn ani agye, me ba. Mma biribiara nha wo, ԑnkyԑ me ne wo papa nso bԑba Ngresi na sԑ yԑba a wobԑtumi de yԑn akyini London. Megye di sԑ ԑbԑduru hͻ na woka Borͻfo sene sԑdeԑ woka seesei no nti wobԑtumi koraa akyerԑ me kakra.'

Ԑnam sԑ na Shirin susu sԑ ne wiase nyinaa ne maame na ͻnim adeԑ pa ara nti ԑbaa sԑ ͻbԑkyerԑ no Borͻfo kakra no, ԑmaa n'ani gyeeԑ. 

Abaayewa no kaa sԑ, 'Megye di sԑ mԑtumi' ԑnna ne sewaa sͻͻ ne nsa ka kyerԑԑ no sԑ berԑ aso sԑ wͻforo wiemhyԑn no ansa na atu akͻ agya wͻn. 

Ngresi akwantutentene no mu no, na Shirin redwene sԑdeԑ ne bra foforͻ no bԑyԑ. Na wasi nkete sԑ ͻbԑbͻ ne ho mmͻden wͻ sukuu mu ԑnna ͻka kyerԑԑ ne ho sԑ ͻbԑpԑ sԑ ͻbԑma n'awofoͻ ani agye. 

Ͻkaa ne tirim sԑ, 'Mԑtumi ayԑ, wei deԑ mԑtumi ayԑ no te sԑ deԑ merete nhwiren.' 

Afei abaayewa no faa mu da soo sԑdeԑ London teԑ ho daeԑ nyinaa. Ͻsoo daeԑ hunuu klͻͻko atentene ne nsubͻnten bayabayaa, ͻhunuu: nkwakora a wͻhyehyԑ kyԑ, mmaa a wͻkurakura kyiniiԑ, bͻͻso akͻkͻͻ ne adan akԑseԑ a Ͻhemaa no ne n'awԑmfoͻ a wͻhyehyԑ akyԑ atentene ne mpaboa akԑseԑ no te mu. 

*

Nanso berԑ a ͻsii wͻ wiemhyԑngyinabea hͻ wͻ London no na ԑnte sԑdeԑ ͻde n'adwene buiԑ no koraa. Na wiem ayԑ nsonso ahosuo a ԑnyԑ fԑ, saa ara na na mframa rebͻ a nsuo nso retͻ. Shirin nyaeԑ a na anka wanhyԑ ne mpaboa a ԑhyԑ no no ԑfiri sԑ na awͻ de ne nansoa pa ara. Deԑ ԑtwa ne nsono mu koraa … Deԑ ԑtwa ne nsono mu koraa ne sԑdeԑ obiara rehwԑ no te sԑ deԑ ͻde tikԑseԑ ne ani mmiԑnsa na ԑfiri wiase foforͻ mu aba no. 

Shirin de ahodwirie hunuu sԑ ne nko ara ne nipa a na ͻhyԑ chador. Abaayewa bi a na ͻgyina hͻ de ne nsa kyerԑԑ ne so sere bisaa ne maame sԑ: 'Adԑn na ͻbͻ abotire kԑseԑ a wͻde akyekyere ne ho saa?' 

Maame no twee ne ba no firii hͻ ka kyerԑԑ no sԑ ԑnkyerԑ obuo sԑ wode wo nsa bԑtenetene afoforͻ so. Na Shirin pԑ sԑ ͻka kyerԑ abaayewa no sԑ ԑnyԑ abotire kԑseԑ na ԑyԑ chador a Tehran mmaayewa ne wͻn nanom ne wͻn nananom hyԑ ԑsiane sԑ ԑka wͻn amammerԑ ho. 

Nokwasԑm, na Shirin nyaeԑ a anka ͻbԑtumi aworͻ ne chador no koraa ԑfiri sԑ, na n'ani nnye sԑdeԑ wͻrehwԑ no no ho, na sԑ ͻbԑnya a anka ͻwͻ Tehran a awia rebͻ a ne nansowa ho bԑyԑ hyehyeehye bio. 

Ne sewaa no ka kyerԑԑ no sԑ, 'Ma yԑnkͻ fie' na ͻkaa ne ho de no kͻtenaa taxi tuntum kԑseԑ bi a kanea kͻkͻͻ bi si n'atifi mu. 

Shirin ka ne tirim sԑ taxi drͻbani no ho yԑ anika. Ͻnte sԑ ne Borͻfo kasa kyerԑkyerԑni Owura Rahimi. Ͻkaa nsԑm bi te sԑ 'Blimey' ne 'yoo, ͻdͻ, worekͻ he?' Shirin deԑ na ͻnte deԑ ͻreka no ase nanso adom nti, ne sewaa no deԑ ͻte aseԑ nti ankyԑ na wͻte sii kuropͻn no mu de wͻn ani kyerԑԑ wͻn fie foforͻ no kwan so.

Na Shirin pԑ sԑ ͻbisa ne sewaa no sԑnti a ͻnhyԑ chador wͻ Ngresi wͻ berԑ a ͻbԑsra ne maame wͻ Tehran biara ͻhyԑ bi. Abaayewa no kaa no ne tirim sԑ, 'Gyama ͻde ne ho resie.' Mmom Shirin kaee sԑ ne maame adi kan aka akyerԑ no sԑ ԑho nhia sԑ wode nipa a woyԑ bԑsie ԑno nti na Shirin nte aseԑ sԑnti a ne sewaa wͻ Ngresi a ͻde ne ho bԑsie. 

London akͻyԑ ne ho kuro bi a ԑwͻ hͻ ampa. Nnawͻtwe a ԑdi kan no da biara na nsuo tͻ na wei maa Shirin adwene firii so koraa sԑ ahuhuroberԑ mpo wͻ Britain. Ԑwom sԑ wͻka kyerԑԑ no sԑ ne Borͻfo kasa yԑ pa ara deԑ nanso na ͻntumi nte deԑ amanfoͻ rekeka no. Afei saa na adan boro ͻha na ԑwͻ Ͻhemaa no ahemfie hͻ a wͻbԑtumi de agye ahͻhoͻ atwa tii ama wͻn deԑ, nanso ԑnyԑ obiara na ͻbԑtumi akͻ hͻ akͻkyea no. 

Abaayewa no aba mu buu wͻ ne tenabea foforͻ yi ho ma no fee ne maame ne ne papa ne ne nnamfofoͻ. Aduane no koraa yԑ soronko: ayԑ nsonso te sԑ wiem a wohwԑ a wͻyi firi nnaka mu wͻ frisa mu, a ԑnte sԑ ne maame loobia polo a saffron ka ho anaasԑ tah-deeg girewgirew a na ԑyԑ fԑ san yԑ dԑ no. 

Berԑ soo sԑ Shirin bԑkͻ ne sukuu foforͻ no mu no, na ne yam hyehye no pa ara nti ͻbͻͻ mmͻden sԑ ͻbԑma ne sewaa agye adi sԑ wayԑ mmrԑ dodo nti ͻntumi nsͻre mfiri mpa so. 

Ͻkaa sԑ, 'Mempԑ sԑ mԑkͻ, mennim obiara wͻ hͻ ԑnna nkurͻfoͻ da so hwԑ me too!' 

Ne sewaa no kaa sԑ 'Mmaayewa pii wͻ sukuu mu a wͻhyehyԑ chador te sԑ wo ara, me ba. Megye di sԑ ԑnnԑ wobԑnya ayͻnkofoͻ pii, wo deԑ hwԑ.'

Nanso ahyԑaseԑ no ankͻ no saa koraa. Nokorԑ na mmayewa binom wͻ hͻ a wͻhyehyԑ chador, nanso na wͻn nyinaa anyinyini sene Shirin a na wͻmpԑ sԑ wͻne no bԑkasa. 

Mmaayewa a na wͻwͻ ͻno ara ne klaase no mpo de wͻn nsa tenetenee ne so sereeԑ. Wͻn nyinaa tirinwi yԑ nahanaha dodoԑ anaasԑ blonde a wͻn ani yԑ bluu, ԑnna ԑnam sԑ abaayewa a waba foforͻ yi yԑ soronko wͻ wͻn mu a ne wedeԑ yԑ tuntum na n'ani nso yԑ tuntum a ͻhyԑ chador nti na wͻmpԑ sԑ wͻne no bԑfa yͻnko. Na woyԑ soronko a ԑnyԑ dԑ koraa nti na Shirin nyaeԑ a na anka ͻsan ne ne maame wͻ fie. 

Wei na awia ahomegyeԑ duruu so a Shirin te ntweaso baabi refa adwene wͻ ͻkwan a ͻbԑfa so adwane akͻ Tehran ho no na abarimawa kumaa bi bͻ piniii no. 

Abarimawa no kaa sԑ, 'Me din de Stephen. Wobԑnom me milkshake no bi anaa?'

Ͻkaa saa no, abarimawa kumaa no de ne strawberry milkshake a dorobԑn tua mu no maa Shirin. 

Milkshake no yԑԑ Shirin dԑ maa ͻmiaa n'ani ansa na ͻretumi agyae nom. 

'Wͻn a aka no deԑ mfii wͻn. Me sei a ԑtͻ bi a wͻmfa me nyԑ hwee ԑsiane sԑ me ne me maame na ԑte. Me papa agya yԑn hͻ dadaada nti seesei deԑ aka me ne me maame nko ara. Me maame nim nyansa pa ara na ͻhwԑ me yie pa ara nso, mmom yԑnni sika saa nti berԑ biara wͻsere me, na deԑ wͻka ne sԑ meyԑ hiani na me ntadeԑ ayeyԑ fi.' Stephen hwԑԑ ne blazer ne ne mpaboa ԑnna ͻkaa n’abati. 'Ԑnyԑԑ fi na dada mmom na ayԑ.'

Prԑko pԑ na abarimawa kumaa no paee sereԑ mu. 'Wͻagyimigyimi kԑkԑ. Deԑn na wͻnim!'

Ԑnam sԑ na Stephen sereԑ yԑ kama na ͻsan nso yii ne dorobͻn node ne strawberry milkshake no tuaa ne ti twee ne nyinaa gonagona prԑko pԑ maa no yԑԑ n'ano ho nti Shirin nso sereeԑ. 

Abaayewa no gye too mu sԑ ͻno ara no ͻmmaa afoforͻ adwenkyerԑ nhaa n'adwene
da enti adԑn na afei na ͻrebԑhyԑ aseԑ?

Ͻkaa sԑ, 'Ԑno ara na woaka no. Deԑn na wͻnim!' Afei ԑnam milkshake a ͻde maa no no nti, Shirin nso yii baklava nnan firii ne botom de atwomͻ dԑdԑԑdԑ no bi maa n'adamfo a wanya no foforͻ no. 

Stephen de baklava mua baako fuaa n’anom kaa sԑ, 'Wo duku no yԑ me fԑ.' 

Shirin ka kyerԑԑ no sԑ, 'Yԑfrԑ no chador.'

Abarimawa kumaa no bobͻͻ asԑmfua no fraa baklava a asikyire atwa mu no wͻ n'anom. 

Ͻkaa sԑ, 'Mehunu sԑ ԑyԑ kama.'

Ankyԑ na Stephen nso yii ne blazer no de kyekyeree ne tiri ho sԑdeԑ ԑbԑyԑ a ͻno nso bԑnya biribi te sԑ chador. Sԑdeԑ abarimawa no ho si yԑԑ sere no nti Shirin san seree bio. Ͻkaa wͻ ne tirim sԑ ԑnam sԑ Stephen bͻ ne ho mmͻden na berԑ biara ͻhwԑ ͻfa papa a ԑwͻ biribiara ho wͻ abrabͻ mu sԑdeԑ Shirin maame kaa sԑ ԑhia sԑ nnipa bԑyԑ no nti ne maame ne ne papa bԑpԑ n'asԑm. 

Ankyԑ na wͻde wͻn ho hyehyԑ yԑ-gye-di ne pampanaa agorͻ ahodoͻ mu wԑ agodibea no ntweaso baabi, taataa wͻn ho wͻ beaeԑ hͻ nyinaa. Wͻkekaa abasԑm ahodoͻ kyerԑԑ wͻn ho ma Shirin kaa Tehran abrabͻ kyerԑԑ Stephen ԑnna Stephen nso kaa anigyedeԑ ahodoͻ a ԑwͻ London te sԑ prama kԑseԑ no aso agodie anaasԑ mmoadoma tenabea anaasԑ siniyibea kͻ ho nsԑm kyerԑԑ Shirin. Kaa kԑseԑ bi mpo wͻ hͻ a wobԑtumi atena mu. 

'Wͻsii no wͻ Asuo Thames ano pԑԑ. Ԑso kԑkԑ!' ͻteaa mu saa berԑ a ͻde ne nsa twaa kanko wͻ wiem. 

Ankyԑ koraa na mmͻfra nkaeԑ hunuu sԑdeԑ Shirin ne Stephen regye wͻn ani fa nti ankyԑ na wͻkͻtwa hyiaa hͻ de wͻn ho gyee agorͻ ne abasԑm a na wͻreka no mu. 

Ansa na wͻrebͻ dͻn ama mmͻfra no no asan akͻ klaase no, na mmͻfra pii atwa ahyia a wͻretie Shirin nsԑm a ͻreka fa Tehran abrabͻ ho no; sԑdeͻ ͻsi kͻtԑԑ mpa ase berԑ a ͻtee sԑ wͻretoto topaeԑ gu wͻn so anadwo no, anaasԑ sԑdeԑ ԑyԑ a ͻkͻsra ne wͻfa bi a ͻte dan kԑseԑ bi mu wͻ mpoano akwamma berԑ mu. Mmͻfra no ani gyee wͻ saa nsԑm ahodoͻ a ͻka kyerԑԑ wͻn no ho nti wͻbisaa nsԑm pii maa Shirin de anigyeԑ yiyii ano. 

Shirin nso bisaa Ngresi ho asԑm ne sԑnti a wͻwͻ ahuhuroberԑ mu na nso awͻ wͻ mu saa, ԑnna sԑnti a Ͻhemaa no nnye ahͻhoͻ. Wei maa mmͻfra no sereeԑ. 

Awieeԑ no, ͻkyerԑkyerԑni bi na ͻbaa agodibea hͻ bԑfrԑԑ mmͻfra no de wͻn kͻͻ klaase ԑfiri sԑ wͻn adwene mpo ankͻ so sԑ wͻabͻ dͻn no ԑfiri sԑ na wͻn ani agye ankasa. 

Ͻnam agodibea no so rekͻ no, Shirin nyaa anisͻ atenka kԑseԑ bi maa Stephen ԑfiri sԑ ͻno na ͻkyerԑԑ no adehia bi. 

Ͻka kyerԑԑ ne ho sԑ, 'Woyԑ so a ԑnyԑ bͻne. Nokorԑ, ԑyԑ anikasԑm ankasa.' Ͻde saa adwene yi hyԑԑ ne tirim maa no dii mu dԑm nam so sii nkete sԑ ͻbԑhwehwԑ ͻbra papa bi ama wͻ Ngresi na wama n'awofoͻ ani agye. Ͻkaa wͻ ne tirim sԑ, 'Hwan na ͻnim ͻkyena asԑm, ebi koraa a me maame ne papa bԑba ha no na wͻnim ͻkwan a mԑtumi afa so ahyia ͻhemaa no.'

Enjoyed this story?
Find out more here