KidsOut World Stories

Bͻͻso a Ԑrekͻ Sukuu mu no Anonymous    
Previous page
Next page

Bͻͻso a Ԑrekͻ Sukuu mu no

A free resource from

Begin reading

This story is available in:

 

 

 

 

 

 

Bͻͻso a Ԑrekͻ Sukuu mu no
 

 

 

 

 

 

 

 *

Adeԑ a na Opoku ani gye ho wͻ Ngresi ho ne bͻͻso no. Ͻne ne maame foro bͻͻso no da biara kͻ Opoku sukuu foforͻ no mu. Na n’ani gye ho sԑ ͻhunu apasennyafoͻ nkaeԑ no. 

Nnipa a na wͻtenatena nkonnwa no mu dodoͻ no ara so no yԑ wͻn a wͻrekͻ adwuma. Wͻafa wͻn ho kamakama kurakura wͻn adwuma baage. Nkonnwa nkaeԑ no nso asuafoͻ te sԑ Opoku na wͻtena so. Na weinom mu dodoͻ no ara anyinyini sene no a wͻhyehyԑ ntadeԑ a ԑyԑ pԑ. 

Apasennyafoͻ a Opoku ani gye wͻn ho pa ara no mu baako yԑ maame bi a ne tirinwi fitaa. Ͻkura kraman ketewa bi wͻ ne baage mu. Maame no kaa sԑ kraman no suro. Berԑ biara Opoku bͻ mmͻden de ne nsa fefa ne ho. 

Na Opoku nte Borͻfo pii nanso ne maame deԑ na ͻte Borͻfo pa ara. Wͻforo bͻͻso no a, ͻbisa ahyԑntuadeԑ no. Bͻͻso drͻbani no prente tikiti no. 

Anͻpa biara ͻka sԑ, ‘Blackfriars nkͻmmaeԑ mmienu.’ Wͻsi firi bͻͻso no mu a, ͻma Opoku ka sԑ, ‘meda wo ase pa ara’. Na ԑnyԑ nsԑmfua a ͻnim dada nanso ͻkͻͻ so kaeԑ no, ԑbԑyԑԑ ade dadaa maa no. 

Asuafoͻ a na wͻwͻ Opoku sukuu mu no dodoͻ no ara yԑ Ngresifoͻ. Mpԑn pii no na ne nko ara te sukuudan no ntwea so baabi. Na ne kyerԑkyerԑni no pԑ nipa, nanso na Opoku fԑre adeԑ. Ͻde asԑmfua baako anoyie na na ԑba, ԑnna wamma ne nsa so. Na ԑha no sԑ ͻbԑka biribi ati wͻ Borͻfo mu. Na n’ani nnye ho sԑ ͻbԑti ͻkasa mmara ho anaasԑ ͻntumi mmͻ asԑmfua bi so yie. Na Opoku pԑ sԑ ͻsiesie ne Borͻfo no ferenkyemm ansa na wakasa, nanso wanyԑ n’adwene sԑ ͻde bԑyԑ adwuma da. 

Ͻpԑnimma ahyԑaseԑ no, Opoku maame nyaa papu. Ͻde ntadeԑ a emu yԑ duru hyehyԑԑ ͻne Opoku. Ͻde duku tenten bi bͻͻ ne menem. Opoku atena awͻ mu pԑn nanso Britian winter berԑ mu no ano yԑ den na ԑyԑ hu. 

Awͻ no dee ne nsatea ano. Wͻrenante akͻ ahyԑnnyinaeԑ hͻ no, ne maame ho wosoeԑ na ͻbͻͻ wa. Opoku sͻͻ ne nsa a awͻ aka no no mu. 

Bͻͻso no baeԑ, na wͻtwԑn maa apasennyafoͻ nkaeԑ no foroeԑ. Opoku maame san bͻͻ wa na ͻkaa sԑ, ‘Opoku, bisa no ahyԑntuadeԑ no.’ 

Opoku guu ahomekokoͻ. Ͻforoo bͻͻso no na ͻtwitwaa n’ani. Sԑdeԑ ԑteԑ daa no, na nnipa pii wͻ mu. Obiara adwene wͻ ne fon ne ne nwoma so. Aberewa no ne ne kraman no nko ara na na wͻapagya wͻn ti. Aberewa no sere hwԑԑ Opoku anim. 

Opoku nyaa akokoͻduro kakra na ͻhwԑԑ bͻͻso drͻbani no anim de obuo kԑseԑ nne kaa sԑ, ‘Blackfries tikiti mmienu.’ 

Bͻͻso drͻbani no hwԑԑ no hann a n’adwene mu ayԑ no keserenee, ‘Blackfries?’ 

Opoku hunuu sԑ ne ho adwiri no, ‘Aane, Blackfries. Me sukuu wͻ Blackfries.’ 

‘Woreka Blackfriars anaa?’ 

Opoku bͻͻ ne ti nko sԑ, ‘Aane’. 

Apasennyafoͻ no binom gyaee wͻn fon so hwԑ. Wohunu sԑ na wͻn bo afu sԑ Opoku ama wͻn reyԑ akyԑ. Opoku maame tuaa tikiti no ka wieeԑ pԑ, ͻyeree ne maame no nsa de n’nim tetԑeԑ. 

Opoku ani wuiԑ. Ͻyԑԑ sԑ ͻbԑboa ne maame nanso wadi nkuguo. Ͻpiapiaa ne hwene hwԑԑ fam saa ara wͻ akwantuo no mu nyinaa. Wͻsi firii bͻͻso no mu no, Opoku anka ankyerԑ bͻͻso drͻbani no sԑ ‘meda wo ase’ sԑdeԑ anka ͻyԑ no daa no. Ne maame no ara na ͻdaa drͻbani no ase. 

Da mu no nyinaa, Opoku yԑԑ dinn koraa senee daa. Ԑwom sԑ ne kyerԑkyerԑni no hyԑԑ no nkuran sԑ ͻnkasa deԑ, nanso wanyԑ n’adwene sԑ ͻne ne no bԑkasa. Sԑ ͻnnim na ͻkasa na ͻyԑ mfomsoͻ a, ͻnnim deԑ ͻbԑyԑ. 

Opoku maame kͻfaa no wͻ sukuu mu no, na ne ho atͻ kakra sene sԑdeԑ na ԑreyԑ no kane no. 

Ͻsere kyerԑԑ Opoku berԑ a ͻyԑԑ no atuu no, ‘Ԑnnԑ, da no kͻͻ yie maa wo?’ 

Opoku amfii no. 

Ne maame buu nkotodwe wͻ ne nkyԑn de ne nsa fefaa ne tirim bisaa no sԑ, ‘Opoku, adԑn?’ 

‘Mafԑre wͻ me Borͻfo ho na ԑha me da mu yi nyinaa. Mepԑԑ sԑ anka mԑboa wo nanso mantumi anyԑ. Mepԑ sԑ me Borͻfo yԑ ferenkyemm, nanso mesuro sԑ mԑkasa. Sԑ anka obiara a ͻwͻ Ngresi ha ka Spanish anaasԑ kasa bi a mete a anka ԑyԑ pa ara. Ԑyԑ den dodo. Mepԑ sԑ mekͻ fie.’ 

Opoku maame tiee no komm. 

Opoku homee so sԑ ͻrepepa n’anim nisuo no, ͻkaa sԑ, ‘Ԑnyԑ hwee, me dͻ. Woresua adeԑ foforͻ a, ԑgye berԑ. Menim saa. Woyԑ abͻfra papa sԑ wobͻͻ mmͻden sԑ wobԑboa me. Meda wo ase.’ 

Ͻfee ne moma so, ‘Ԑho nhia sԑ wobԑyԑ ferenkyemm. Obiara nyԑ ferenkyemm. Deԑ ԑhia ne sԑ wobԑnya akokoͻduro.’ Ͻsere kyerԑԑ no, ‘Worebͻ wo ho mmͻden pa ara, na mede wo hoahoa me ho sԑ. Opoku, mma w’aba mu mmu.’

Opoku bͻͻ ne ti nko. 

Wͻnam kwan so rekͻ ahyԑnnyinaeԑ hͻ no, ͻdwenee ne maame nsԑm no ho na ͻhunuu sԑ ԑyԑ nokorԑ. Wͻn a wͻbͻ wͻn ho mmͻden pa ara no mpo ԑtͻ da bi a wͻyԑ mfomsoͻ. Opoku faa no sԑ deԑ ԑma wͻyԑ abenfoͻ ne sԑ wͻhwe ase a, wͻsͻre san yԑ bio da foforͻ. Sԑ ͻnya akokoͻduro na ͻpem kͻ n’anim a, ԑnneԑ ͻbԑtumi ayԑ biara. 

Bͻͻso no bԑduruu hͻ a ԑrebԑfa wͻn akͻ fie. Na bͻͻso no ayԑ mma bio, ԑnna Opoku hunuu nnipa a wͻhyehyԑ kootu, sukuu mmͻfra, ne mmaa a wͻkurakura nkraman na wͻne wͻn ho wͻn ho rekasa anaasԑ wͻrekasa wͻ wͻn fon so. Wͻde akokoͻduro kasa na sԑ wͻyԑ mfomsoͻ, wͻsere kwa na wͻkͻ wͻn anim. 

Wͻduruu baabi a wͻbԑsi no, Opoku ne ne maame si firii bͻͻso no mu ԑnna Opoku danee ne ho hwԑԑ bͻͻso drͻbani no de animteԑ ne akokoͻduro ka kyerԑԑ no sԑ, ‘Meda wo ase!’ 

Bͻͻso drͻbani no sereeԑ na ͻdaa no ase nso. Opoku ne ne maame rekͻ fie no, ͻde hyԑԑ ne tirim sԑ saa mfomsoͻ koraa ԑnhyԑ da nha adwene biara saa. 

Enjoyed this story?
Find out more here