KidsOut World Stories

Ͻyͻnkopa Noel White    
Previous page
Next page

 

 

 

 

Ͻyͻnkopa

Ngresifoͻ Anansesԑm

 

 

 

 

 

*

Koo Nimo abusua tu firii Iraq kͻͻ Ngresiman mu berԑ a na ͻyԑ abarimawa koraa. Na Koo Nimo mpԑ sԑ ͻbԑfiri ne fie a ԑwͻ Samarra no nanso ne papa kaa sԑ ԑyԑ adeԑ a ԑbԑboa abusua no ԑfiri sԑ wͻn bammͻ ho nsԑm kͻ fam ԑnna na ͻpԑ sԑ ne ba no nyini wͻ ͻman a wͻgye obiara to mu mu. Koo Nimo papa ka kyerԑԑ ne ba no sԑ Ngresi yԑ ͻman a amammerԑ biara bi wͻ hͻ a wͻn nyinaa tumi tena faako a ԑmfa ho ne baabi a obi firi ne ͻsom a ͻwom. 

Ԑwom sԑ na Koo Nimo ani nnye Iraq a ͻrefiri hͻ no ho deԑ, nanso ankyԑ na kuropͻn a wͻfrԑ no London no mu abrabͻ ne no faeԑ. Na London yԑ anika pa ara ԑnam adan ne nsrahwԑbea akԑseԑ nti, ԑnna Koo Nimo ankasa na n’ani gye Planetarium ne Osu kԑsԑeԑ Thames ne ne tete atwene akԑsԑeԑ a ԑdeda so no ho. 

Koo Nimo ne abarimawa bi a ͻte fie a ԑtoa wͻn deԑ so mu a wͻfrԑ no Andrew mpo faa yͻnkoͻ. Na Koo Nimo ne Andrew di agorͻ wͻ prama so ԑnna ԑtͻ da bi nso a, wͻne Andrew maame kͻhwԑ mmoa wͻ mmoabeaeԑ hͻ. Andrew de ne mmaduaba ne akuaba ahodoͻ nyinaa maa Koo Nimo de dii agorͻ san ka akuninifoͻ a ԑwͻ n’abrabͻ mu ho nsԑm kyerԑԑ no. Wͻbͻͻ pata bi mpo wͻ Koo Nimo mfikyifuo mu na wͻtetԑ mpanimfoͻ wͻ hͻ. 

Ԑwom sԑ na London yԑ kuro kԑseԑ pa ara na emu nyԑ hye te sԑ sԑdeԑ na Samarra hyeԑ teԑ no deԑ, nanso Koo Nimo ani gyeeԑ ԑsiane sԑ na ahuhuroberԑ no mu yԑ anika. Ͻtuu mpͻn wͻ ne Borͻfoka mu, nkanka wͻ mmoa a Andrew de maa no ho, mmom na nsԑmfua pii wͻ hͻ a Koo Nimo nte aseԑ na ԑnkyԑ na wafԑre ԑsiane sԑ na ͻntumi nkasa sԑdeԑ ͻpԑ sԑ anka ͻtumi kasa no. 

Ԑbͻ duruiԑ a nnua nhahan hyԑԑ aseԑ tete tͻeԑ no, Koo Nimo papa kaa sԑ berԑ aduru sԑ ne ba no bԑkͻ sukuu. Na Koo Nimo adi mfeԑ nson nti na ͻrebԑkͻ sukuu gyinapԑn a ԑtͻ so mmiԑnsa wͻ mpͻtam hͻ mfiaseԑ sukuu mu – gyinapԑn korͻ no ara na na ne yͻnko Andrew wͻ! 

Ԑwom sԑ na Koo Nimo yam hyehye no wͻ sukuu a ͻrekͻ no ho deԑ nanso ne papa ne ne maame hyԑԑ no nkuran sԑ ԑhͻ bԑyԑ anigyebea na ͻbԑhyia ayͻnkofoͻ afoforͻ bebree na wasua anikasԑm foforͻ pii. 

Koo Nimo maame kaa sԑ, ‘Aborͻfo sukuu deԑ ԑyԑ papa pa ara’. 

Ne papa de too so sԑ, ‘Ԑnkyԑ biara wo Borͻfo bԑtu mpͻn.’

Ne nyinaa mu no, Koo Nimo akoma antͻ ne yam, nanso Andrew de animteԑ bԑbͻͻ pono mu anͻpa a n’anim maa no hunuu sԑdeԑ anigyeԑ bԑwͻ sukuu mu no, ԑnam sԑ na ͻgye ne yͻnko no di nti, n’akoma tͻͻ ne yam. 

Mmarimawa no baanu dii nkͻmmͻ saa ara kͻduruu sukuu no kwan ano. Andrew kaa agodibea hͻ ho asԑm ne ͻkyerԑkyerԑni a ͻpԑ n’asԑm pa ara ne mmarimawa a wͻn ho yԑ anika pa ara ne mmaayewa a wͻn ho yԑ fԑ pa ara ne mpԑn dodoͻ a wͻde ma wͻn koko kamakama a ԑyԑ custard ho asԑm kyerԑԑ Koo Nimo. Na Koo Nimo nnim custard nanso ͻhwԑ sԑdeԑ Andrew de ahosԑpԑ kaa ho asԑm no a, ͻkaa ne tirim sԑ ԑnneԑ ԑbԑyԑ dԑ pa ara. 

Mmom berԑ a mmarimawa no wurawuraa wͻn sukuudan mu no, nneԑma ankͻ sԑdeԑ Koo Nimo susuu sԑ anka ԑbԑkͻ no. Ͻkyerԑkyerԑni no ka kyerԑԑ Andrew sԑ ͻntena anim hͻ ԑnna ͻdaa Koo Nimo adi kyerԑԑ mmͻfra nkaeԑ no. N’ani annye ho sԑ wͻmaa no sͻre gyinaa asuafoͻ no nyinaa anim no ho, ԑnna abarimawa baako teaa mu sԑ ͻyԑ ͻhͻhoͻ a ne ho bͻn. Mmarimawa ne mmayewa no nyinaa sereeԑ, ԑnna berԑԑ a wͻkaa sԑ ͻmmͻ ne din na ͻnkyerԑ baabi a ͻfiri no, abarimawa baako nso tweetwee sԑdeԑ Koo Nimo nne teԑ no. 

Abarimawa fo no kaa sԑ, ‘Madam mente deԑ ͻreka no ase. Ͻntumi mpo nka Borͻfo.’ 

Awieeԑ no, wͻmaa Koo Nimo kwan ma no kͻtenaa akyire hͻ nanso ԑnam sԑ na wayԑ ankonam nti, na anka ͻbԑnya a, na ͻte Andrew nkyԑn. Abaayewa a na ͻte bԑn no no de ani hwԑԑ no saa ara maa Koo Nimo ho yerayeraa no, ԑnna adesua rekͻ so no, ͻpagyaa ne nsa kaa sԑ ͻbԑtumi akͻtena baabi foforͻ anaa. Na Koo Nimo ntumi nhunu adeԑ a ͻde ayԑ abaayewa no. 

Wͻbͻͻ dͻn no, na berԑ aso sԑ wͻkͻ agodibea kͻdi agorͻ. Mmͻfra no nyinaa totoo wͻn nwoma mu, hyehyԑԑ wͻn kootu pue kͻͻ abͻnten kͻgyina autum awia no mu. Ͻkyerԑkyerԑni no kyeree Koo Nimo gyinaa hͻ kakra na ͻde ahyԑnsodeԑ a ne din wͻ so bͻͻ ne dwompa a ԑhyԑ no no mu. 

Ͻde sereԑ kakra kaa sԑ, ‘Ԑno ara ne no’. ‘Seesei mmͻfra no nyinaa bԑtumi ahunu wo din.’ 

Koo Nimo dwenee ho sԑ ahyԑnsodeԑ no yԑ sere, na berԑ a ͻkͻͻ agodibea hͻ no, mmͻfra no nyinaa hyԑԑ aseԑ de wͻn nsa kyerԑkyerԑԑ ne so sereeԑ. 

Abarimawa bi a ͻkura blond nwi a akyinkyim kaa sԑ, ‘Wokura mmaa din.’

Na Koo Nimo pԑ sԑ ͻkyerԑ mu sԑ ԑnyԑ mmaa din nanso na ͻsuro dodo. Koo Nimo bͻͻ hu no, afei deԑ na ne Borͻfo no asԑe koraa a nsԑmfua no nyinaa akeka ne menem. Ne werԑ hoo yie a na ͻpԑ sԑ ͻdwane firi agodibea hͻ kͻ ne na ne n’agya nkyԑn a ͻmma sukuu mu hͻ bio. Mmom ͻyԑԑ sԑ ͻrebԑdwane no ara na ͻtee ԑnne bi a ͻnim dada. 

‘Hi Koo Nimo.’ Berԑ a ͻpagyaa ne ti no na ԑyԑ Andrew na ͻgyina ne nkyԑn pԑԑ. 

Andrew hwԑԑ mmͻfra a atwa ahyia hͻ no na ͻwosoo no ti. Ͻbisaa sԑ, ‘Mo nyinaa deԑn na ԑha mo?’ ‘Meka kyerԑԑ m’adamfo Koo Nimo sԑ sukuu yԑ dԑ. Adԑn na moresԑe no ama no yi?’ 

Abaayewa tentennten bi a na ͻgyina ԑdͻm no anim kaa sԑ ‘Ͻyԑ soronko.’ 

Andrew yii n’ano sԑ, ‘Wo nso saa ara. Sukuu yi mu nyinaa wo na woware pa ara nanso sԑ nkurͻfoͻ di wo ho fԑw a, sԑ w’ani nnye ho, anaa?’

Ԑnna Andrew hwԑԑ abarimawa a ne tirinwi akyinkyim no. Ͻka kyerԑԑ abarimawa no sԑ, ‘Na sԑ wo nso sԑ nkurͻfoͻ ka sԑ wokura mmaa tirinwi a w’ani nnye’. ‘Yԑn nyinaa yԑ soronko, na ԑno na ԑma yԑn ho yԑ anika. Sԑ anka yԑn nyinaa te sԑ yԑn mfԑfoͻ a, anka abrabͻ ankasa koraa bԑyԑ sԑn?’ 

Mmͻfra no nyinaa yԑԑ dinn.

Afei Koo Nimo nyaa akokoͻduro. Ͻde sereԑ kaa sԑ ‘Wͻn ho ahyi bi’. 

‘Ԑno ara ne no!’ Andrew teaa mu de too n’adamfo no sereԑ no so. ‘Wͻn ho yԑ ahyi pa ara!’ 

Ԑno nti nso mmͻfra no nyinaa hyԑԑ aseԑ sereeԑ. 

Wͻkeka kyerԑԑ wͻn ho wͻn ho sԑ, ‘Wo ho yԑ ahyi pa ara.’ 

Andrew toaa so kyerԑԑ wͻn sԑdeԑ ͻne Koo Nimo dii summer no faeԑ, sԑdeԑ wͻbͻͻ mu bͻͻ pata dii agorͻ wͻ agoprama no so, ne sԑdeԑ Koo Nimo kyerԑ sԑ ͻpԑ Batman asԑm sene Superman, ԑne sԑdeԑ ͻmpԑ kraman nam nti ͻda wͻn mu fua! 

Mmͻfra no seree bi kaa ho na ankyԑ na wͻhyԑԑ aseԑ sԑ wͻreka sԑdeԑ wͻyԑ soronko soronko ne nneԑma a ԑma no ba saa ho asԑm. Peter Jenkins mpo deԑ ͻpagyaa ne dwompa no de awoͻ mu ahyԑnsodeԑ pink bi a ԑda n’afuru so kyerԑԑ wͻn. 

Ͻde ahosԑpԑ kaa sԑ ‘Wei na mefrԑ no sԑ adeԑ soronko. Meka biribiara sԑ mo mu biara nni hͻ a ͻwͻ awoͻ mu ahyԑnsodeԑ kԑseԑ sene me deԑ yi!’ 

Berԑ soo sԑ wͻkͻ dan mu no, Andrew pagyaa ne nsa ka kyerԑԑ ͻkyerԑkyerԑni no sԑ ͻpԑ sԑ wͻkasa fa sԑdeԑ ԑyԑ adepa kԑseԑ sԑ obiara yԑ soronko wͻ nnipa nkaeԑ ho na wͻhwԑ hunu sԑ seesei nnipa pii firi wiase afaanan nyina reba Ngresiman mu hͻ a wͻrebԑhyehyԑ abrabͻ foforͻ ase sԑdeԑ n’adamfo Koo Nimo teԑ no ara. 

Ͻkyerԑkyerԑni no gye too mu na ͻkaa sԑ ampa ԑhia sԑ ankorԑankorԑ biara bԑde ne ho, ԑnna ͻsan kaa sԑ ԑyԑ anikasԑm kԑseԑ sԑ Britain nyinaa akͻyԑ supͻ bi a amammerԑ nyinaa bi wͻ hͻ. Koo Nimo twerԑԑ saa nsԑmfua yi too hͻ na ͻka kyerԑԑ ne ho sԑ ͻbԑsua ne nyinaa ho asԑm na wakae berԑ biara. Ͻsan twerԑԑ asԑmfua ‘adamfoͻ’ wͻ ne nwoma mu. Na ͻnim n’asekyerԑ dada, nanso na ͻpԑ sԑ ͻtwerԑ to hͻ ԑsiane sԑ ͻhunuu sԑ ne ti yԑ pa ara sԑ ͻbԑhyiaa adamfo papa te sԑ Andrew a ͻgyina nnipa akyi na ͻnka sԑ wͻyԑ soronko, nsͻre ntia wͻn. 

 

Enjoyed this story?
Find out more here