KidsOut World Stories

Nnomeԑ No Vasconcelos Monteiro    
Previous page
Next page

Nnomeԑ No

A free resource from

Begin reading

This story is available in:

 

 

 

 

Nnomeԑ No

Pͻtukiifoͻ Abasԑm

 

 

 

 

 

*

Berԑ tenten bi a atwam, na akuraa kumaa bi si kwaeԑ kԑseԑ no ano. Na asomdwoeԑ wͻ saa akuraa yi ase mpԑn pii no ara nanso na nkurasefoͻ no suro Lobizon a na wͻnim sԑ wͻte kwaeԑ no mu noho ara no. Na Lobizon no yԑ abͻdeԑ tumm bi a wͻn fa yԑ nipa na wͻn fa yԑ mpataku, ԑna amamfoͻ se bosome no gyina biara a, wͻpue firi kwaeԑ no mu te gu mu hwehwԑ nnipa nam. 

Na saa abͻdeԑ no koraa firi he na ԑbaeԑ? Wei nyԑ den: Nnomeԑ a ԑda ͻba barima a ͻtͻ so nson biara so no. Nnomeԑ no nka mmaayewa no, na mmom sԑ ԑna bi wo mma mmarima nson a, deԑ ԑbԑyԑ biara, deԑ ͻtwa toͻ no bԑyԑ Lobizon. 

Wͻwoo Filipe no, na ne maame suro. Na ͻrehwehwԑ ͻbabaa na mmom ԑnyԑ babarima a ͻtͻ so nson; mmom na Filipe maame wͻ ayamye ne ͻdͻ nti wannane n’akyi ankyerԑ ͻno ara ne ba, a ԑmfa ho ne deԑ nkurafoͻ no ka faa nnomeԑ no ho.

Mfeԑ pii bԑtwaam a bͻne biara ansi. Filipe nyinii bԑyԑԑ abarimawa ͻhoͻdenfoͻ a ne maame ne ne papa ne ne nuammarima nsi no dͻͻ no. Nanso berԑ biara na Filipe tumi hunu sԑ sԑdeԑ wͻyԑ no ne sԑdeԑ wͻyԑ ne nuanom a aka no nyԑ pԑ. Wankͻ sukuu ԑfiri sԑ ͻkyerԑkyerԑni no amma kwan. Wei antwa yie ԑfiri sԑ na abarimawa no kͻn dͻ adesua a na n’ani abere dennennen sԑ ͻne mmͻfra afoforͻ bԑfa yͻnkoͻ. 

Berԑ biara a Filipe maame bԑsoma no sԑ ͻnkͻtͻ paanoo no, wͻn a wͻwͻ akuraa no ase no mpԑ sԑ wͻbԑfa baabi a ͻnam no, ԑnna berԑ biara na wͻde hu ne suro a ԑha abrimawa no na ԑrehwԑ no. Mmͻfra nkaeԑ no ne no nni agorͻ ԑnna sԑ bosome no gyina a, wͻmma no kwan ma no nkͻ turo no mu. Deԑ ԑtwa toͻ no na na ԑnyԑ koraa ԑfiri sԑ na Filipe ani gye bosome no ho pa ara, biribi a ԑfa ho – nkanka berԑ a ԑbԑgyina ayԑ kurukuruwa wͻ wiem no – na ԑkasa kyerԑ Filipe kanyan ne sunsum ma no nya ͻpԑ sԑ ͻbԑto dwom na wasa na wasan atu mmirika. 

Ԑwom sԑ na ͻbra mu dwo deԑ, nanso na anigyeԑ nnim. Mfeԑ rekͻ n’anim no, na yԑ ara na ͻreyԑ ankonam. Na ͻnni adamfoͻ biara ԑnna obiara wͻanto nsa amfrԑ no mpo sԑ ͻne mmͻfra afoforͻ. Ԑtͻ da bi a ͻte sԑ mmͻfra no resere na ԑma no dwennwene sԑ ԑnneԑ agorͻ bԑn na wͻredi ne mu anigyeԑ pii a wͻrenya no saa no. Filipe san hunuu sԑ ne maame ne ne nuammarima no mpo ahyԑ aseԑ rehwԑ no kwan soronko bi so. 

Na Filipe taa bisa ne ho sԑ, ‘Deԑn nko ara na ԑnkͻ yie wͻ me ho? Menyԑ akwadaabͻne saa. Meyԑ fie adwuma a ԑrekame ayԑ sԑ menna suban bͻne adi mpo. Adԑn nti na wͻhwԑ wͻ kwan soronko so sene mmͻfra nkaeԑ no?’ 

Aka kakra ama no adi n’awoda a ԑtͻ so dunnum no, Filipe werԑ ho senee daa. Ne maame amma no kwan amma no amfiri fie ahe biara mpo ԑnna ͻbԑn no biara a na ne bo afu. Nkwadaabͻne no nso hunu sԑ ne nko ara redi n’agorͻ wͻ ne fie nkyԑn mpo a wͻtoto aboͻ bͻ no, nanso sԑ ͻdane n’ani sԑ ͻne wͻn de rekͻ fee so a, wͻde mmirika keka mu te sԑ deԑ ͻyԑbonsam bi no. Ԑtͻ da bi a na ԑyԑ Filipe sԑ anka ͻnnwane nkͻ kwaeԑ birentuo bi mu nkͻka hͻ a ͻmma bio. 

Da koro bi, ne maame kyeree no tenaa ase na ͻkyerԑ no ne haw no nyinaa ase. Ͻkaa sԑ, ‘Woyԑ me ba barima a wotͻ so nson. Me ba, wͻadome wo.’  

Filipe adwenem yԑԑ no bebree. Ͻbisaa sԑ, ‘Nnomeԑ bԑn?’ 

‘W’awoda a ԑtͻ so dunnum so no, wobԑdane Lobizon, abͻdeԑ bi a ͻyԑ nipa fa ne pataku fa.’ 

Na Filipe nim deԑ ԑfa Lobizon ho nyinaa ԑnam nwoma a wakan ne nsԑm a ne nuammarima no susu sԑ wada a wͻka no nti. Mmom na wͻnka nkyerԑԑ Filipe da sԑ nnomeԑ da ne so wͻ saa kwan no so. Na ͻmpԑ sԑ ͻbԑdane Lobizon. Na ͻmpԑ sԑ ͻbԑyԑ sakasaka anaasԑ otirimuͻdenfoͻ, ԑnna kyerԑ sԑ ͻhwԑ pa ara sԑ ͻrebԑnya bͻwerԑ atenten a ne ho nwi kuhaa wͻ ne honam nyinaa no a, na ԑboro n’adwene so. 

N’awoda a ԑtͻ so dunnum no anwummerԑ duruiԑ no, abarimawa Filipe werԑ ho senee daa wͻ n’abrabͻ mu. Ͻtenaa ne mpa no so wͻ sum no mu su guu ͻno ara ne so. Ͻkaa ne tirim sԑ, ‘Da biara meyԑ ankonam.’ 

‘Da biara wͻfa me sԑ meyԑ soronko. Seeseͻ wͻadome me sԑ mԑdane Lobizon. Deԑn na menyԑ? Deԑ na daa merepԑ ayԑ ara ne sԑ wͻbԑfa te sԑ sԑdeԑ wͻyԑ obiara no ara. Deԑ daa mepԑ ara ne sԑ me ne me nnamfofoͻ bԑdi agorͻ wͻ kwaeԑ mu na mahwԑ bosome fԑfԑԑfԑ no anadwo.’ 

Ԑhͻ ara na Filipe hwԑԑ ne mpoma mu hunuu sԑ bosome no repue akͻ wiem bluu no mu a nsoroma pii wͻ hͻ. Na ԑyԑ bosome fԑfԑԑfԑ kԑseԑ na ԑmaa anigyeԑ bԑhyԑԑ n’akoma mu. Afei adeԑ soronko bi siiԑ: Filipe tee biriibi te sԑ deԑ wͻrenu ne yam no na ahokeka te guu ne wedeԑ ani nyinaa. Nnyegyeeԑ huhuuhu bi firii ne koko mu pueeԑ na ͻpagyaa ne ti hwԑԑ bosome no frԑԑ no wͻ ͻkwan bi a ͻmfaa so mfrԑԑ no da. Prԑko pԑ na nwi fufuu wͻ ne honam ani ԑnna ne nsa ne ne nansowa so bͻwerԑ nyinaa fufuu gangann. Ne ntadeԑ tete guu ne nan ase wͻ fam. Berԑ a Filipe hwԑԑ ahwehwԑ no mu no, ͻhunuu pataku-abarimawa tenten bi sunsum sԑ ԑrehwԑ n’anim a ne ho nwi ayԑ kufuu a n’ani kosua ayԑ sԑ nkrawoͻ na ayԑ te sԑ deԑ asosͻ wͻ sum no mu.

Ͻkaa mu sԑ, ‘Enti meyԑ Lobizon!’ 

Filipe tee nka sԑ wanya abotͻyam wͻ bosome no ne kwaeԑ no mu na ԑno maa no hunuu sԑ berԑ aso sԑ ͻdane n’akyi ma n’abrabͻ dada no na ͻgye ne hyԑberԑ to mu. 

Pataku-abarimawa no buee ne mpoma no. Ͻyԑԑ sԑ ͻrehuru ate asi abͻntene no, ͻgyinaa twaa n’ani hwԑԑ ne dan no mu deԑ ԑtwa toͻ san dwenee ne maame ne ne papa ne ne nuammarima nsia no ho. ‘M’abusuafoͻ, da biara mԑkae mo, mmom seesei deԑ ԑwͻ sԑ megye onii meyԑ yi tom na mehyԑ abrabͻ foforͻ ase.’ 

Afei ͻhuri firii ne mpoma no mu tuu mmirika wuraa kwaeԑ no mu, saa berԑ no nyinaa na ͻrebobͻ mu kyerԑ bosome no, a wanya anidasoͻ foforͻ soronko bi wͻ n’akoma mu. 

Berԑ a na Filipe hyԑ kwaeԑ birentuo no mu no, ͻgyinaa beaeԑ fԑfԑԑfԑ bi na ͻhwԑԑ tete nnua no ne bosome fԑfԑԑfԑ a ԑwͻ wiem no. Ͻbobͻͻ mu bobͻͻ mu hurihuri saeԑ san sereeԑ… na afei berԑ a ͻgyaee mmobͻmu ne asa no, ͻhwԑԑ ne ho na ͻhunuu sԑ Lobizon afoforͻ abԑtwa ne ho ahyia wͻ beaeԑ hͻ. Na ebinom yԑ akumaa te sԑ Filipe ԑnna ebinom nso anyinyini. 

Wͻbͻpinii Filipe maa no akwaaba. 

Wͻn mu baako de ayͻnkofa nne bͻkͻͻ kaa sԑ, ‘Seesei woaba fie, kwaeԑ kԑseԑ a ayͻnkofoͻ wͻ mu no mu.’ Enti ԑhͻ na Filipe hunuu sԑ saa wͻnnomee no biara saa mpo. 

Ͻseree kakra pagyaa ne ti hwԑԑ bosome no kaa sԑ ‘Meyԑ Lobizon a maba fie!’ Ԑnna ͻde n’ahoͻden nyinaa bͻͻ mu. Lobizon nkaeԑ no nyinaa bԑkaa ne ho de ԑnne kԑseԑ baako bobͻͻ mu kyerԑ wiem anadwo no de hyԑԑ bosome no animuonyam. 

Filipe maame nso de atadeԑ a ͻde da gyinaa ne mfikyifuo mu kwansini ahodoͻ pii tiee dwom a Lobizon no reto a mframa bͻkͻͻ no de firi kwaeԑ birentuo no mu de baeԑ no. Aberewa no sere kyerԑԑ ne ho ԑfiri sԑ na ͻnim sԑ ne babarima a ͻtͻ so nson no anya baabi a wͻbԑgye no ͻfԑ so, na wanya ayͻnkofoͻ pii anyini akyԑ wͻ anigyeԑ mu. 

Enjoyed this story?
Find out more here