KidsOut World Stories

Wansane ne Sebͻ David Heathfield    
Previous page
Next page

Wansane ne Sebͻ

A free resource from

Begin reading

This story is available in:

 

 

 

 

Wansane ne Sebͻ

Brazilfoͻ Abasԑm

 

 

 

 

 

 *

Wansane nenam asuo kԑseԑ a ԑwura kwaeԑ no mu no ho. ‘Ow, na ͻbra bԑn ni? Menni daberԑ. Gyama gye sԑ mesi fie bi ma me ho. Baabiara ne ha.’ 

Wansane toaa so kͻeԑ. 

Sebͻ nso bԑfaa asubͻnten kԑseԑ no ho na ͻde no saa ara wuraa kwaeԑ no mu. Ͻno nso baa beaeԑ korͻ no ara. ‘Ow, ͻbra bԑn na merebͻ yi? Gyama da koro mԑba fam na mapԑ fie bi atena mu. Baabiara ne ha.’ 

Ԑnna Sebͻ toa so kͻeԑ. 

Wansane san baeԑ, na ͻde n’abԑn bԑdodͻͻ mfudeԑ no guiԑ, ͻbubuu nnua no dwirii asase no so sԑ ͻbԑsi ne fie na afei ͻtoaa so wuraa kwaeԑ no mu. 

Afei Sebͻ baeԑ: ‘Ԑha na meyԑԑ sԑ mԑsi me fie no, nanso obi adodͻ asase no so adwiri so. Wei deԑ, pefee, ԑyԑ Tupan Nyame na ahyira so. Ԑha na mԑsi me dan no.’ Sebͻ no de anigyeԑ dwirii asase no so maa fam hͻ yԑԑ torontorom, de ne se yԑԑ fam hͻ – dennennen hyԑnn – na ͻfirii hͻ kͻͻ kwaeԑ no mu. 

Wansane san baeԑ: ‘Wͻayԑ fam ha kama, hyԑnn a wͻatintim so. Pefee, wei yԑ Tupan Nyankopͻn na ͻreboa me yi.’ Ahoͻden foforͻ baa Wansane mu, ͻtoo fasuo maa fie no. Wansane wieeԑ no ͻkͻͻ kwaeԑ no mu. 

Afei Sebͻ baeԑ: ‘Tupan Nyankopͻn ato fasuo ama me fie foforͻ yi. Afei mԑbͻ so.’ Sebͻ hoͻdenfoͻ no bͻͻ so, na ͻwieeԑ no ͻtoaa so kͻͻ kwaeԑ no mu. Wansane hunuu sԑ wͻabͻ dan no so: ‘Tupan ahyira me ampa.’ 

Efie no mu no, Wansane yԑԑ adankora mmienu: Ͻno ara ne ho baako ԑnna Tupan nso deԑ baako. Ԑnam sԑ na adeԑ resa nti ͻkͻͻ adan no mu baako mu kͻdaeԑ. 

Afei Sebͻ san baa fie bԑhunuu sԑ adankora mmienu na ԑwͻ hͻ: ‘Tupan asi dan baako ama ne ho sԑdeԑ ͻne me bԑtena fie ha.’ 

Ͻkͻͻ dan baako no mu kͻdaeԑ. 

Wansane ne Sebͻ daa fie korͻ no ara mu anadwo no. Ahamakye no, wͻn baanu sͻreeԑ.

Wansane hunuu Sebͻ. Sebͻ hwԑԑ Wansane: ‘Woboaa me ma mesii me dan yi?’ 

‘Aane. Woboa me ma mesii me dan yi?’ 

‘Aane.’ 

Ԑbaa no saa no Sebͻ ne Wansane tena bͻͻ mu ... berԑtia bi mu. 

Ԑkͻm dee Sebͻ: ‘Sͻ gya. Fa dadesԑn si so. Merekͻ ahayͻ aba.’ Ԑnna Sebͻ firii fie hͻ kͻeԑ ԑnna Wansane nso sͻͻ gya no de nsuo sii so. 

Sebͻ hunuu wansane bi kyeree no kumm no. Ͻsoaa no de no baa fie. Ͻhyԑԑ aseԑ noaa wansane no. Wansane hunuu deԑ Sebͻ renoa no, ne werԑ hoeԑ. 

Sebͻ hyԑԑ aseԑ weeԑ. Wansane bͻͻ hu nti wannidi. Wansane kͻͻ ne dan mu bͻͻ mmͻden sԑ ͻbԑda. 

Sebͻ kͻwuraa ne dan mu. 

Anadwo no nyinaa, Wansane ani gu so saa ara, a wabͻ hu sԑ anhwԑ a na Sebͻ abԑkye no awe. 

*

Anͻpa no, Wansane ka kyerԑԑ Sebͻ sԑ: ‘Sͻ gya. Fa dadensԑn no si so. Noa nsuo. Merekͻ ahayͻ aba.’ 

Wansane kͻͻ kwaeԑ no mu. ԑhͻ na ͻkͻtoo sԑ sebͻ bi rese ne bͻwerԑ akԑseԑ no ano wͻ dua bi akyi. Wansane toaa so ara kͻpemm sԑ ͻkͻtoo Tamandua a ͻwe ntatea no. 

‘Saa sebͻ no anka wo ho asԑmpa.’ 

Tamandua bo fuiԑ. Ͻde ne bͻwerԑ a emu yԑ den na ano yԑ nam no kͻto hyԑԑ sebͻ no so. Sebͻ no wuiԑ no, Tamandua gyaa hͻ kͻeԑ. Wansane no soaa sebͻ a wawuo no de no kͻͻ fie. 

Berԑ a Sebͻ hunuu adeԑ a Wansane renoa no, ͻbͻͻ hu. Wantumi annyina ano berԑ a na Wansane rewe nam no nti ͻkͻhyԑԑ ne dan mu. Nanso, nokorԑ, sԑdeԑ wonim dada no, Wansane nwe Sebͻ nam. 

Afei Wansane kͻͻ ne dan mu. Wansane antumi anna. Na Wansane susu sԑ anhwԑ a na anadwo no Sebͻ abԑkye no awe. 

Sebͻ antumi anna. Na Wansane susu sԑ anhwԑ a na anadwo no Sebͻ abԑkye no awe.

Awieeԑ no Sebͻ tͻͻ nko faa mu daeԑ.

Awieeԑ no Wansane tͻͻ nko faa mu daeԑ. Berԑ a ͻretͻ nko no, ne bͻwerԑ akԑseԑ no twitwii dan no ho yԑԑ dede kԑseԑ. Sebͻ bͻͻ pitiri, a wabͻ hu sԑ Wansane reba ne so. Ͻteaam kԑseԑ. Wansane susuu sԑ Sebͻ reba ne so abԑkum no. 

Wansane dwane firii fie hͻ! Sebͻ dwane firii fie hͻ! Wͻn baanu no mu biara de n’ani kyerԑԑ baabi foforͻ. 

Firi saa berԑ no, Sebͻ ne Wansane ntena mmͻͻ mu bio. 

Enjoyed this story?
Find out more here